Biilit assartuutit amerliartuinnarput, biililli inunnik assartuutit amerliartornerat ingasanneruvoq
Biilit inunnik assartuutit 4.507-it 2017-imi januaarip aallaqqaataani nalunaarsugaasimapput. Ukiup ataatsip ingerlanerani 7,7 pct.-imik imaluunniit 321-nik biilit inunnik assartuutit amerlisimapput. Biilit assartuutit 1.357-it 2017-imi januaarip aallaqqaataani nalunaarsugaasimapput 3,2 pct-imik imerlisimallutik, titartagaq 1 takuuk.
Titartagaq 1. Januaarip aallaqqaataani biilit aamma biilit assartuutit amerlassusaat
Najoqqutaq: Akileraartarnermut Pisortaqarfimmi qamutit motoorillit nalunaarsorsimaffik Naatsorsueqqissaartarfimmit misissoqqissaagaq
2017-imi januaarip aallaqqaataani qamutit motoorillit 8.831-t nummerpladillit nalunaarsugaapput. Taakkunannga 8.646-t motooriliupput, 185-illu kalitaallutik.
Saqqummersitami paasissutissat Akileraartarnermut Pisortaqarfimmi qamutit motoorillit nalunaarsorsimaffiat tunngavigalugu suliarineqarput. Qamutit motoorillit akileraartussaatitaaneranut inatsit malillugu qamutit motoorillit aamma kalitat nalunaartussaatitaasut tamarmik nalunaarsuiffimmi ilaapput. Qamutit motoorillit ukioq affakkaarlugu akileraartussaatitaasut aamma qamutit motoorillit akileraartussaatitaanngitsut ilaapput. Nalunaarsuiffimmi pineqartut tamarmik nummerpladeqarput. 2013 aallarnerfigalugu snescooterit, traktorit, qamutit kalitat, lastbiilit kalitarsui il. il. nalunaarsuiffimmut ilanngunneqarput.
Nalunaartussaatitaasut saniatigut qamutit motoorillit nalunaarsuiffiannut nalunaartussaatitaanngitsut ilaapput. Tassaapput qamutit motoorillit ungalusani inunnit orninneqarsinnaanngitsuni imalluunniit qeqertani avinngarusimasuni atorneqartut.
Ukiut ingerlaneranni biilit inunnit atorneqartartut amerlatsikkiartuaarsimapput, titartagaq 2 takujuk. 2016-imi januaarip aallaqqaataani biilit 4.507-iusimapput taakkunannga 2.677-it inunnit pigineqartut, 1.830-llu inuussutissarsiortunit pigineqartutut nalunaarutigineqarsimallutik. 2013-imi nummerpladellit nalunaartussanngortitaanerisa kingorna qamutit motoorillit inuinnarnit pigineqartut amerlatserujussuarput. Titartakkami 2-mi qamutit motoorillit allat aamma qamutit motoorillit ilaapput biilit inunnit pigineqartut titarnermut tassunga ilanngunneqanngillat.
Titartagaq 2. Januaarip aallaqqaataani qamutit motoorillit nalunaarutigineqarsimasut amerlassusaat
Nalunaarut: Qamutit kalitat titartakkami ilaanngillat. Qamutit motoorillit inunnit pigineqartut ilaatigut tassaapput snescooterit, taakku 2013-imi nummerpladelinnik nalunaartussanngortitaaneq pissutaalluni 2014-imi nalunaarutigineqartut amerlasoorujussuupput.
Najoqqutaq: Akileraartarnermut Pisortaqarfimmi qamutit motoorillit nalunaarsorsimaffik Naatsorsueqqissaartarfimmit misissoqqissaagaq
Politiit kisitsisitigut paasissutissaataat malillugu 2016-imi qamutit motoorillit 2.477-it nalunaarsorneqarsimapput. 2015-imut sanilliullugu 8,9 pct.-imik qaffasinneruvoq, 2012-imut sanilliullugu quleriaat sinnerlugu amerlanerupput, taamani qamutit motoorillit 262-it nalunaarsorneqarsimapput. 2013-imi qamutit motoorillit amerlatserujussuarnerannut pissutaavoq maskiinat entrepenørit atortagaat, qamutit kalitat, lastbiilit kalitaat, traktorit il. il. nummerpladeqartussanngortitaanerat nalunaarutigineqartussanngortitaanerallu. 2002-mi, 2013-2016-imi nutaatut nalunaarutigineqarsimasut kisitsisaat immikkuullarissut Kalaallit Nunaanni Politiinit ajunnginnerarlugit akuerineqarput.
Titartagaq 3. Biilit inunnit pigineqartut nutaat nalunaarsukkat
Najoqqutaq: Kalaallit Nunaannit Politiit – Ukiumoortumik kisitsisitigut paasissutissiaq
Malugiuk: 2002-mi, 2013- 2016-imi nutaatut nalunaarutigineqarsimasut politiinit akuersaarneqarput.